Manuel Blanco Fernández naceu no barrio de Deán, en Ribeira, fillo dun de Palmeira e unha de Carreira. Con 8 anos deixou a dorna na que faenaba xunto co seu avó e o seu curmán para subir aos autocares de Baltar e Sarasquete e amenizar cantando a viaxe entre Aguiño e A Pobra do Caramiñal.
Anos despois, un locutor descubríuno nunha taberna do porto de Vigo e púxolle o alcume “el pescador”.
Pasou por unha quincena de orquestras galegas como a Gran Parada e fixo carreira en solitario. Participou en innumerables xiras por Galicia, España e tamén Londres, Suíza ou Portugal. “Fantasía marinera”, un pasodoble de José María Legada e Mario Arnold, de Los Chiclaneros, foi un dos seus grandes éxitos.