No programa de entroido, Mercedes Peón achegounos esta tradición que se conserva en Rairiz de Veiga. Esta localidade ourensá é o único lugar de Galicia onde, segundo explica a nosa experta en recolleitas, pervive a recreación dunha batalla entre mouros e cristiáns.

O que vemos é unha pequena mostra da batalla que se celebra  durante a tradicional Romaría da Saínza, unha festa declarada na actualidade de Interese Turístico Galego e que cada ano atrae milleiros de visitantes a esta aldea limiá. Na mesma, unhas 60 persoas recrean o conflito histórico que data de 1840, cando un cristián que se atopaba en perigo de morte durante a batalla pediu auxilio á virxe da Mercé e vió cumprida a súa petición. Os veciños de Rairiz festexan deste xeito ano tras ano á súa virxe.